UKA 2001/27

 

Suliffissaaleqisunik sulilersitsiniarneq pillugu Inatsisartut peqqussutissaattut siunnersuut

 

pillugu

 

Inatsisartut Isumaginninnermut Suliffeqarnermullu Ataatsimiititaliaata

 

ISUMALIUTISSIISSUTAA

 

siunnersuutip aappassaaneerneqarnerani saqqummiunneqartoq

 

Inatsisartut Isumaginninnermut Suliffeqarnermullu Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Asii Chemnitz Narup, Inuit Ataqatigiit, siulittaasoq
Inatsisartuni ilaasortaq Ruth Heilmann, Siumut, siulittaasup tullia
Inatsisartuni ilaasortaq Mikael Petersen, Siumut
Inatsisartuni ilaasortaq Jakob Sivertsen, Atassut
Inatsisartuni ilaasortaq Loritha Henriksen, Kattusseqatigiit

Inatsisartut Isumaginninnermut Suliffeqarnermullu ataatsimiititaliaata UKA 2001-imi siullermeerinerup kingorna suliffissaaleqisunik sulilersitsiniarneq pillugu Inatsisartut peqqussutissaattut siunnersuut nassuiaatitai ilanngullugit misissorpaa.

 

Tusarniaanermit akissutisiat

Ataatsimiititaliaq suliffissaaleqisunik sulilersitsiniarneq pillugu peqqussutissatut siunnersuutip ataatsimiititaliamit suliarineqarnerani atugassanik tusarniaanermit akissutisianik aammalu tusarniaaneq pillugu allakkiamik piniarsimavoq.

Ataatsimiititaliap paasivaa tusarniaanermi sivikinnerpaamik piffissaliunneqartussatut piumasaqaat naapertorlugu suliffissaaleqisunik sulilersitsiniarneq pillugu peqqussutissatut siunnersuut sapaatip akunnerinik sisamanik piffissaliilluni tusarniaassutigineqarsimasoq aammalu attuumassuteqartut tamarmik tusarniaaffigineqarsimasut.

 

Siunnersuutip imarisai

Piginnaanngorsaaqqinnissamut ikiorsiisarneq pillugu peqqussummik Inatsisartut UPA 2001-imi akuersissutiginninnerat tunngavigalugu siunnersuut saqqummiunneqarpoq. Tamatuma kingunerisaanik akissarsianut tapiissuteqartarneq allamillu ilinniagaqaqqinneq pillugit aalajangersakkat maanna atuuttut suliffissaaleqisunik sulilersitsiniarneq pillugu peqqussummit peerneqassapput, tassa akissarsianut tapiissuteqartarnermut allamillu ilinniagaqaqqinnermut malittarisassat piginnaanngorsaaqqinnissamut ikiorsiisarneq pillugu Inatsisartut peqqussutaanni aalajangersarneqarmata. Kommunip suliffissaqartitsiniutaani suliffissaaleqisup sulisinnaanera suli periarfissaassaaq, tassanimi sulisoq imaaliallaannaq sulilersinneqarsinnaammat. Taakkununnga ikiorsiisarneq suliffissaaleqisunik sulilersitsiniarneq pillugu Inatsisartut peqqussutaat naapertorlugu suli ingerlanneqartassaaq.

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit naammagittaalliornissamut innersuussut maanna atuuttoq peerneqarpoq, Inatsisartummi peqqussutaat isumaginninnerup iluani malittarisassanut ilaanngimmat, taamaattumillu naammagittaalliorsinnaanermut pineqartumut ilaatinneqarani. Suliffissaaleqisunik sulilersitsiniarneq suliffeqarnermi suliniutaavoq naammagittaalliorsinnaanermut malittarisassanik immikkut aalajangersaavigineqarsimanngitsoq. Inatsisartulli Isumaginninnermut Suliffeqarnermullu Ataatsimiititaliaat naliliivoq innuttaasut suliffissaaleqisunik sulilersitsiniarneq pillugu Inatsisartut peqqussutaat malillugu ikiorserneqartartut Inatsisartut Ombudsmandiannut nalinginnaasumik naammagittaalliuuteqarsinnaanermikkut inatsisitigut illersugaanerat qulak-keerneqartoq.

Tamatuma saniatigut siunnersuummi oqaasertatigut naqqiissuteqartoqarpoq aammalu allaffissornikkut oqilisaassiumalluni suliffissaaleqisunik sulilersitsiniarneq pillugu peqqussutip maanna atuuttup 1994-imeersup allannguutissaanik saqqummiussinissamut taarsiullugu peqqussutissatut nutaatut siunnersuummik saqqummiussisoqarluni.

Isumaginninnermut Suliffeqarnermullu Ataatsimiititaliap isumaqatigiittup inassutigaa suliffissaaleqisunik sulilersitsiniarneq pillugu Inatsisartut peqqussutissaattut siunnersuut saqqummiunneqarnermisut iluseqartillugu akuersissutigineqassasoq.

Taama oqaaseqarluni Inatsisartut Isumaginninnermut Suliffeqarnermullu Ataatsimiititaliaata suliffissaaleqisunik sulilersitsiniarneq pillugu Inatsisartut peqqussutissaattut siunnersuut aappassaaniigassanngortippaa.

 

Asii Chemnitz Narup
Siulittaasoq

     Ruth Heilmann                                            Mikael Petersen

 

      Jakob Sivertsen                                           Loritha Henriksen